Con ta desaroya e disciplina den mucha?

DTG CD babies

Tin hopi forma pa logra desaroya disciplina den mucha. Pero mi ta kere e ta cuminsa hopi biaha cu cosnan ful otro cu bo ta kere. E ta cuminsa cu structura. Ora bo ta duna e mucha un structura cla, esey kiermen un ritmo di dia constant, reglanan cu ta cla, duidelijk pa un mucha y cu bo ta aplica tur dia consecuentemente.

Esey ta hinca un mucha den un ritmo cu ta hasie mas fasil pa e siña. Por ehempel, si tur dia ora bo ta lanta bo sa cu prome cos cu bo ta hasi ta cambia bo paña, come, of come, cambia bo paña, skeiro bo djente. Si tur dia ta e mesun ritmo, mesun ora, e mucha ta siña “Hey, esey ta loke mi tin cu hasi”.

Tin biaha tin mucha cu tin dificultad pa keda cu nan atencion, nan focus, riba loke nan tin cu hasi. Paso e no ta asina facil. Nan ta bai hunga, nan ta bira distrai. Bo por yudanan cu plachi. Asina bo ta siñanan door di bai cunan den e pasonan, por ehempel:

  1. Ora nos lanta prome ta kita pijama, despues ta coy serbete y bai den baño pa baña.
  2. Ora nos cla di baña ta skeiro djente y peña cabey.
  3. Ora nos ta cla di peña nos ta bay den camber bisti paña, meña y sapato.
  4. Ora nos ta cla di bisti, nos ta coy nos tas di scol, bai den comedor y sinta na mesa.

Y asina bo por structra ta con ta cuminsa cu bo dia, pa bin na mesa pa come. Bo por pensa algun manera pa traha un serie di plachi cu lo yuda bo splica bo jiu e secuencia di un actividad cu e ta haci tur dia?

Kico esey ta pidi di mayor?

Cu bo ta conciente di con bo ta biba, anto con bo ta pone e structura p’e mucha. Paso si bo mes como hende grandi ta biba iregular, den sentido cu un dia bo ta drumi dies’or, otro dia bo ta bai drumi diesdos’or, otro dia och’or, bo ta come un dia si, un dia bo ta salta cuminda. Bo yiu no por desaroya e structura, pasobra e ta bai mee cu bo.

Nos tur sa, por ehempel cu ora di scol, muchanan mester lanta na tempo, nan mester come, bisti, bai cu nan huiswerk, etcetera. Y den vakantie ta mas dushi, nos por hasi un tiki kico nos kier, nos por lanta mas laat, nos por bai un caminda. Hopi biaha den vakantie e structura bo ta lag’e cai.

Esey ta bon, basta bo corda cu e ora bo yiu tambe ta bai laga los. Paso e ora ki bo ta ripara? Nan ta drumi iregular, nan ta bira mas druk. Pakico? Pasobra nan structura vast b’a lage los. No ta nada, bo por deal cu n’e. Pero e no ta “mal comportacion”. Dus e ta un reaccion logico di un mucha. Dus structura ta uno.

Algo otro cu ta importante ta pa nos compronde cu mucha tin cu siña comportacion. E no ta algo cu den un solo biaha nos ta splicanan anto “okay”, nan ta hasi’e. Un ehempel ta “ruim op”. Mucha en general no ta gusta ruim op. Tin ta gusta, pero mayoria no ta gusta, “Nos ta gusta hunga, pero ora di ruim op ta laf”. Awo, con bo ta siña un mucha ruim op? Con bo ta hasi cu e ta ruim op su cosnan sin cu tur biaha bo tin cu zundra y rabia?

Wel, un di e cosnan ta cu na cuminsamento, por ehempel, bo por pone e structura cu ora hunga bo ta hunga cu dos, tres cos pareu. Bo no ta duna mucha demasiado co’i hunga pareu. Pakico? Pasobra nan ta djis perd’e, nan ta perde den tur e co’i hunganan. Dus ora nan tin cu ruim op “Ta unda mi tin cu cuminsa? Mi no sa unda pa cuminsa, dus mi ta lag’e”. Custumbra bo yiunan hunga cu cierto cosnan, anto ora nan cab’i hunga di biaha nan ta ruim nan op den un lugar special.

Kico esey atrobe ta exigi di bo como mayor? Pa uno, abo tin cu pone un structura, abo tin cu organisa esey. Si bo ta dunanan djis un caha, tira tur cos aden, otro biaha ki nan ta bai hasi ora nan ta hunga? Nan ta djis bolter e caha, tur cos ta bin abou. Abo ta irrita. Mientras, si bo tin e disciplina bo mes, pa bo bisa “Okay, e co’i hunganan, e autonan ta kinan, of e popchinan ta bai eynan, e blokinan ta bai eynan. Si e mucha ta siña fe’i cuminsamento cu ta esey ta e structura e ta bai bira mas facil pa e cumpli cu n’e.

Asina structura, regularidad y pasenshi ta e hermentnan cu nos ta usa. Y si b’a ripara cu e mucha tin dificultad pa cuminsa cu e ruim op, bo ta bisa “Okay, ban ruim op.. ki bo kier ruim op prome, e popchinan, of e blokkinan? Bo ta corda unda e blokkinan ta bai si? Eynanan nan ta bai”. Eseynan ta medionan pa yuda mucha desaroya e disciplina interno cu a lo largo, ora nan ta grandi, nan mester di dje. Den un futuro nos ta sigui papia riba otro forma pa siña mucha cumpli cu e disciplina.

Bin bek y lagami sa con a bay of post bo pregunta riba nos Facebook page: www.facebook.com/developtogrow

Bo a disfruta di e articulo aki? Comparti’e riba Facebook click aki –> Share

Helen Guda is passionate about making the lives of children better. That’s why she helps parents develop the skills to educate their children and develop the skills needed to live a full happy life.

As a Certified Conscious Discipline Instructor on Aruba, Helen is always teaching in Papiamento. And so, her posts are in the local language. All the posts are also available in English on this website.

Submit a Comment

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

%d bloggers like this: