Nos Tur Ta Diferente y Nos Tur Ta Mescos…

Tur maestro cu tin un klas di mucha y tur mayor cu tin un of mas yiu, sa cu cada mucha ta diferente.  Nan ta mustra diferente, tin caracter diferente, abilidadnan y interes diferente.

Tin mucha cu ta rabia lihe y hari lihe, tin cu ta mas trankil pero por rabia masha ora nan rabia, tin cu ta gusta hopi activitidad, tin cu ta contento di sinta trankil den un huki lesa buki y asina nos por sigui.

Y naturalmente nos tur sa cu mucha di diferente edad ta actua diferente tambe. Ora nan ta chikito, abo como mayor ta nan mundo, ora nan ta teenager, otro mucha di nan edad ta hopi mas importante cu bo (asina e ta mustra anto).

Esey kiermen cu nos manera di educa nos muchanan lo ta diferente tambe? Naturalmente si! Of no?

Mi Experiencia Cu Disciplina Consciente

Durante e 8 aña cu mi ta un trainer di Disciplina Consciente, mi ta ripara algo interesante. Discipline Consciente, un manera integral pa educa mucha riba tereno social-emocional y regulacion propio, originalmente a wordo desaroya mas tanto pa muchanan di scol basico y eynan mas tanto pa muchanan mas jong. Integral kiermen cu e ta siña nos no solamente con pa anda cu e muchanan (manera hopi methodo di educacion), pero tambe con nos mes por bira e miho ehempel pa nos yiunan y con nos por crea un ambiente den cual e muchanan por siña abilidadnan social emocional na un manera natural.

Dus cu Disciplina Consciente, e adulto ta desaroya su mes, e ambiente ta cambia y e adulto ta haya herment pa siña e muchanan diferente abilidadnan, manera compostura (controla bo reaccionnan emocional), asertividad (defende bo mes y respeta otro), empatia y mas.

Loke mi a ripara durante training di tanto maestro como mayor y otro educador, ta cu nan tabata bisa, e abilidadnan di DC no ta yuda mi solamente den klas, pero tambe na cas cu mi yiunan mas grandi, of tambe na trabou cu mi coleganan.

Loke tabata pasa ta cu e hendenan aki tabata ripara cu ora nan tabata cambia, e hendenan rond di nan tabata reacciona otro, mas positivo riba loke nan ta haci.

Disciplina Consciente tin 4 parti basico:

  • Compronde e diferente Estadonan Emocional di hende
  • Siguridad
  • Coneccion
  • Resolve Problema

Disciplina Consciente ta siña nos cu e unico hende cu bo por cambia ta bo mes, dus con bo por yuda otro cambia? Dor di crea un ambiente sigur y forma coneccion cu e hende. Ora e hende ta depuesto pa siña, e lo siña e abilidadnan pa resolve problema na un manera positivo, un manera cu e por siña di e problema. Por ehempel, si un mucha ta lubida su huiswerk na cas tur dia, nos por dun’e straf, lag’e skirbi regla of bis’e cu e no por drente klas mas, of nos por siñ’e maneranan con e por ta mas organisa y corda pa trece su huiswerk. Of nos por trat’e na un manera cu e por sinti su mes suficientemente sigur cu e por bisa nos cu e no por traha su huiswerk pasobra e no ta compronde e materia.

Con bo por yuda otro cambia? Dor di crea un ambiente sigur y forma coneccion cu e hende.

Durante 8 aña di training a bira mas cla pa mi cu tur mucha y adulto basicamente tin necesidad na mesun cos, Siguridad, Coneccion y Abilidad pa resolve problema. Y pa por haci esaki nan tin cu compronde con nan mesun celebro y di mucha ta traha. E manera den cual nos ta siña nan esaki lo ta poco diferente, pero e ingredientenan ta mescos.

“Mi no tabata tin mucho gana pa bin e workshop aki, mi no a kere cu e lo tin sentido pa mi, pero mi a siña masha hopi mes”.

Luna cu a pasa mi tabata tin e privilegio pa por duna un training di Disciplina Consciente na e team di E.P.B. San Nicolas (nos scol pa Enseñansa Profesional Basico). Un grupo di mas o menos 60 maestronan, di cual un grupo grandi di hende homber (esaki ta diferente for di enseñansa basico y gruponan di traimerdia), a cera conoci cu e base di Disciplina Consciente .

Tabata hopi bonita pa wak con nan por a traduci Disciplina Consciente den nan mesun bida y den e situacion den klas y na scol, maske nan alumnonan ta di edad mas grandi y nan sistema di scol ta diferente cu scol kleuter y basico.

Despues di e training diferente maestro a bin yama mi danki personalmente, y tin un cu a bisa mi : “Mi no tabata tin mucho gana pa bin e workshop aki, mi no a kere cu e lo tin sentido pa mi, pero mi a siña masha hopi mes”.

Tur mucha ta diferente? Si.

Tur mester di un otro manera di trata nan? Si.

Pero e ingredientenan di e trato ta keda mescos pa tur mucha y tur hende grandi: Siguridad, Coneccion y Por Resolve Problema

Helen Guda

2 Comments

  1. Bon dia.
    Workshop 19 april 2016 tin luga disponibel ainda? Please laga mi sa. Hopi interesa pa assisti.

    Saludos

Submit a Comment

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

%d bloggers like this: